喺我小學五年級暑假嘅時候，又再次跟左阿媽返韓國ㅎㅎ

而我人生第一次嘅針灸就喺冇病冇痛嘅情況下，喺韓國度體驗咗啦ㅋㅋㅋ

當時係冇任何原因，韓國阿媽突然之間心血來潮就帶咗我哋去한의원 到針灸，甚至阿媽自己都未去過，完全唔識個醫師，由於當時我係第一次去中醫院，所以到大個先知韓國한의원 的神奇之處⋯

行咗三層樓梯上到去間한의원 ，一入去個姑娘就會問你幾多個人要針灸，俾咗錢之後就可以好似排隊咁一個個靠住牆坐喺地下，當有咁上下人數之後，醫生就會拎住一大筒針，好似玩遊戲過關咁逐個幫你針！

在場大部份都係老人家，當佢話邊度唔舒服，醫生就會幫佢針嗰個位，輪到我哋嘅時候，

雖然阿媽幫我講：呢個小朋友冇俾錢唔使針㗎啦～

(이 아이 돈 안 줬어요.)

但個醫生竟然話：唔緊要啦，咁可愛免費幫你針啦！

(괜찮아요, 예쁘니까 그냥해 줄게요)

跟住就將支針拮咗落我隻手指度！！！

喺我發出驚嚇嘅悲鳴之前，支針已經存在咗喺我隻食指上面，個醫生見到我就快喊出嚟，可能佢都嚇咗一跳即刻話：針完就會好舒服好精神㗎啦～(끝나고 되게 시원해 질 거야)

實不相瞞，我內心非常之不爽，心諗我而家都冇唔舒服，針完有幾舒服啊！？

過咗20分鐘左右，姑娘就又會好似玩遊戲過關咁樣逐個幫你拆返啲針，咁究竟針完有冇舒服咗呢？

的確係冇特別大嘅感覺，有機會係因為實在太過驚嚇，亦都有可能係因為我只係小學五年級身體非常健康所以效果唔明顯⋯

而離開嘅時候我亦都非常之小氣咁樣，即刻衝咗去着鞋等阿媽出嚟，連감사합니다 , 안녕히 계세요 都無講((미안…

不過後來長大先知道，呢一種針灸模式通常係一星期只有一兩次會係咁樣，係特登為咗比啲老人家用較低嘅價格，保養身體嘅一種方法，其實係非常善良嘅做法嚟㗎～

至於喺韓國한의원 睇完醫生都係會有中藥要食，喺香港你可以揀攞返去自己煲/醫生幫你煲埋，但韓國係追求快靚正嘅地方，所以你可以叫佢幫你煲完，再配送埋去你屋企，又或者好多한의원 都可以選擇藥粉，咁就唔需要特登煲，適合生活工作不定時嘅人嫁！

資料來源 ：

https://sbnet.or.kr/37074/

https://www.docdocdoc.co.kr/news/articleView.html?idxno=2028250

https://health.chosun.com/site/data/html_dir/2022/06/13/2022061301605.html