各種各樣的飯卷~

上次提到韓國可能係世界上最鍾意食飯嘅國家，咁就當然不得不提김밥(飯卷)啦~

大家去韓國旅行嗰陣，可能都有見過有間叫김밥천국(飯卷天國)嘅連鎖店，入面賣嘅飯卷款式起碼都有10種以上，除咗最常見嘅雜錦飯卷，仲有泡菜飯卷，芝士飯卷，牛肉飯卷等等…

但入面嘅飯卷種類，其實都算係韓國人心中的官方飯卷口味，就好似我哋去茶餐廳唔使睇菜單都知要叫咩咁ㅋㅋ

如果想食啲特別口味嘅飯卷，就可以去街市/偏門啲嘅小店到碰吓運氣，尤其是望落比較舊式嘅舖頭，經常都會有出奇不意嘅菜單㗎！

不過真正嘅國民飯卷口味一定係꼬마김밥！

꼬마김밥 ，直譯係小不點飯卷，其實即係用包完飯卷用剩嘅材料，再包啲迷你小飯卷，有時會得白飯餡，或者得一條黃蘿蔔做餡等等~

除咗唔使浪費食材，仲可以俾小朋友當零食/下午茶，甚至好多市場嘅아주마 會免費送俾幫襯嘅人食㗎ㄷㅂ

꼬마김밥 못 참지 忍唔住要食迷你小飯卷

不過韓國人鍾意食飯卷，都真係非常合情合理，因為真係好好食！又非常之易整！

就算係夜晚宵夜突然想食，都可以好快就整到，簡直係為食懶人恩物啊！

不過經常聽到好多香港人話，整極都唔係韓國食到嘅飯卷味，所以俾個天大嘅tips大家，就係千祈唔好以為同日本壽司一樣就落醋，飯嘅調味，只係需要落麻油同鹽就夠㗎啦~

話說細個學校旅行/聯歡會嗰啲時候，阿媽一定會朝早就整飯卷俾我帶返學，個個同學仔都雙眼發光覺得好正好新奇！但我喺學校反而完全唔食飯卷，因為朝早食꼬마김밥 已經食到超飽ㅋㅋㅋ

由於飯卷太好食，所以再比多個tips大家ㅎㅎ

就係如果你將飯卷放入雪櫃一晚，第二日拎出嚟煎到香脆嚟食嘅話，你就解鎖咗飯卷之黃金食法啦ㅋㅋ

資料來源 ：나혼자산다 MBC240126방송