韓國家庭限定宵夜！

唔知香港人家庭，細個嘅時候屋企宵夜係食咩㗎呢？會唔會都係煮個公仔麵之類呢？

雖然我哋屋企阿媽係最鍾意食公仔麵嘅韓國人，但反而我哋好少喺宵夜食公仔麵，通常都係會食啲好快搞掂，重口味但又唔會太飽嘅嘢食！

而我哋屋企三大宵夜食譜就係魷魚乾，雞泡魚乾，同埋焊紫菜啦！

首先魷魚乾一定係阿媽喺韓國買返嚟，原條魷魚整成，放喺冰箱入面真係放一年都唔會壞！

然後每次就會拎一塊出嚟，擺入微波爐度叮30秒，之後反轉再叮20秒！

最好就喺微波爐隔離望住佢，條魷魚有少少想捲起嘅時候就好即刻熄咗佢，因為只要叮多咗少少就會即刻好硬㗎啦⋯

但如果叮到個完美魷魚，就真係極香極脆，好食到不得了！！

不過由於魷魚乾好鹹，自己一個真係食唔晒，所以每次想食之前，都要喺屋企尋求會同自己一齊食嗰條魷魚嘅人ㅎㅎ

然後雞泡魚乾就係，韓國便利店都可以買到，一塊塊膠袋包裝嗰隻雞泡魚乾，又係攞出嚟叮30秒，然後剪成一條條，又香又煙靭，帶有少少甜味真係超級好食㗎！

香港都買到韓國雞泡魚乾㗎，有興趣嘅同學仔可以返去試吓叮嚟食～

最後就係重頭戲焊紫菜！

話說我哋屋企由於阿媽係韓國人，成日都會包飯卷，所以個冰櫃長期都有飯卷紫菜，但飯卷紫菜同一般餸飯紫菜係唔同㗎，係一整大塊，厚同硬身啲，得紫菜味嘅紫菜ㅎㅎ

細個嘅我一直以來，都係直接打開包凍紫菜食，煙靭得來有淡淡紫菜味，過口癮一流！

直至有一日阿媽見到我直接食塊紫菜，就話幫我焊下，我心諗你擺喺啲火上面一陣成塊紫菜冇埋啦⋯

但阿媽用佢類似燒棉花糖嘅技術，將塊紫菜焊成啡綠色，變得超級好食！！本身已經夠好食嘅紫菜，多咗啲煙燻嘅味道，真係以為自己處於濟州島海邊咁有海味ㅋㅋ

自此每當食宵夜嘅時候，我哋屋企想食嘅人都會分工合作，一個負責叮魷魚同雞泡魚乾，一個負責焊紫菜～

題外話：不過韓國人DNA鍾意食公仔麵嘅講法，我都覺得係真嘅，因為我哋阿媽都好鍾意食公仔麵，而且對煮公仔麵都好有要求，可能就係因為冇辦法求其煮個公仔麵，宵夜就懶得俾心機去煮，所以佢通常正餐先會食公仔麵！

資料來源 ：

https://www.kurly.com/goods/5136959

https://jungjinfood.co.kr/overview/?idx=265

https://seaweedsupermarket.com/product/sushi-50-sheets-nori/

https://namu.wiki/w/%EB%9D%BC%EB%A9%B4