三角咖啡奶的悲慘回憶

韓國嘅牛奶除咗有草莓，香蕉味之外，應該大部份鍾意韓國嘅同學仔都有飲過咖啡味嘅牛奶啦～

雖然而家喺便利店比較常會見到紙盒包裝嘅咖啡牛奶，但以前咖啡牛奶係只有三角形包裝㗎咋！

而呢一個三角形包裝嘅咖啡牛奶，就曾經為我帶嚟咗非常之悲慘嘅回憶⋯

話說細個完全唔識韓文，第一次跟阿媽返韓國，去婆婆屋企附近嘅小士多舖買零食嘅時候，第一次見到有嘢飲係會用三角形膠袋包裝，覺得非常神奇就即刻買左～

但由於間士多舖都係老人家經營，於是忘記咗俾飲管我，返到屋企我諗咗好耐究竟係點飲㗎呢？

喺我思考一番之後，決定用門牙咬開個袋，但估唔到個袋非常之實淨，咬到啲牙超痛，然後婆婆見到我就用鉸剪幫我剪開其中一個角

婆婆嘅原意應該係叫我用飲管/倒出嚟飲，而當時嘅我覺得可樂都係就咁飲啦，就直接拎住個三角形袋開始飲，但問題就係個袋係三角形，所以個開口都會係扁，於是我就倒到全身都係⋯

但令我最驚嚇嘅係，喺我身上面聞到一陣咖啡味，嗰一刻我先知原來係咖啡牛奶嚟⋯

雖然咖啡牛奶咖啡味唔重，但當時只係小朋友嘅我，簡直係覺得好似中藥咁苦咁難飲ㅋㅋㅋ

咁究竟點解咖啡牛奶個袋要三角形呢？

咁就要去返韓國牛奶嘅歷史啦ㅎㅎ

有返咁上下年紀嘅同學仔都知以前嘅牛奶係用玻璃樽裝，由於玻璃樽太唔環保，亦好難回收後期就開始用紙盒裝純牛奶，但當서울우유 後來推出咖啡牛奶，為咗顯示佢嘅獨特同破格，就決定嘗試使用透明包裝，而且仲整到三角形樣引起大家嘅關注同熱度！

而當時亦都的確成功引起非常大話題，於是서울우유 就決定繼續沿用三角形包裝作為咖啡牛奶嘅特色啦～

咁點解後期又會再出返紙盒包裝嘅咖啡奶呢？

就係因為三角形咖啡奶，連韓國人都覺得非常唔方便，雖然好可愛好好飲，但首先三角形已經係不利於掌控，好容易倒瀉，而且每次開嚟飲都要用鉸剪剪開，支飲筒又好容易跌落個袋入面，又一定要即刻飲晒⋯

種種嘅不方便都導致咖啡奶最終都係出咗紙盒裝，不過喺韓國嘅民間傳說，大家都認為三角形包裝嘅咖啡奶比起紙盒裝係好味好多！

唔知係真係成份唔同，定純粹心理作用呢？

資料來源 ：

https://www.thinkfood.co.kr/news/articleView.html?idxno=80687

https://www.brandi.co.kr/products/38366459

https://29street.donga.com/article/all/67/2362213/1