驚呆老師們的韓國媽媽！

話說韓國人貪靚，就係人都知啦~所以當一個韓國少女成為咗母親之後，絕對係會將貪靚本領轉移落小孩身上㗎~

所以由細到大，韓國阿媽經常會對我哋外表做好多努力，買唔同嘅衫，唔同嘅造型，帶我哋去釘耳窿，甚至幫我哋電髮~

但留意返，電髮嗰陣我只係幼稚園三年級咋ㅋㅋㅋ

當時我留咗長頭髮，而見到阿媽都有電髮，我就話: 我都想電啊~ 媽咪 ，見到個女主動提出扮靚，阿媽當晚就即刻喺屋企開咗支電髮藥水幫我整，然後第二日返學所有老師都非常驚訝…

但由於所有老師都知阿媽係韓國人，所以都係笑一笑，然後就非常興奮，自此老師都非常鍾意我，每日都當我係公仔咁樣摸嚟摸去ㅋㅋ

而當然我嘅幼稚園畢業照，都係曲髮造型去影㗎啦~

然後升咗上小學，雖然已經剪走晒電咗嘅頭髮，但阿媽都仲係每日都會幫我扎辮，而老師們都當然係繼續非常欣賞我每日嘅髮型ㅎㅎ

但令韓國阿媽一扎成名嘅係，佢有日幫我紮咗條好普通嘅馬尾，但之後竟然係我個頭夾咗十幾個五顏六色嘅迷你夾仔…

通常小學生最多都係鬢吓邊就已經算好用心，但我個頭上面竟然係有咁多顏色，我嗰日返學淨係入門口就已經比5-6個miss圍住影相…

雖然老師同同學仔都非常鍾意我嘅髮型，但係過度嘅關注喺我心入面留下左羞恥心嘅陰影，自此我就冇再叫阿媽幫我扎辮啦ㅋㅋㅋ

韓國tmi :

韓國基本上所有中小學，甚至幼稚園都係可以電髮/染髮㗎，當然太過出眾/奇特嘅造型都會比老師警告，但不論老師/家長/大眾都非常支持同享受小朋友嘅扮靚，對佢哋嚟講已經係日常文化潛規則嘅一部份嚟㗎啦！

資料來源 ：

https://www.coupang.com/vp/products/4881666359?itemId=6356736826&vendorItemId=73652015697&isAddedCart=

https://m.blog.naver.com/withcoffe89/222833170357